Kơxo lơ 28/3, a Tíu pêi cheăng Kăn xiâm hnê ngăn tơnêi têa, pôa Lương Cường, Kăn xiâm hnê ngăn tơnêi têa hiăng pơkuâ po leh tơdah pôa Lula da Silva, kăn xiâm pơkuâ kong têa Brazil pôu râ tơnêi têa troh Việt Nam. Klêi kơ’nâi po Leh tơdah păng ‘nâng kân krip, pôa Lương Cường, Kăn xiâm hnê ngăn tơnêi têa hiăng tơpui tơno ƀă pôa Lula da Silva, kăn xiâm pơkuâ kong têa.

A rôh tơpui tơno, pôa Lương Cường, Kăn xiâm hnê ngăn tơnêi têa tối nhên rôh lăm pôu rôh kố cho vâ tối rơdêi Brazil ngăn nhuô̆m ƀă rơhêng vâ thăm mơnhông tơnêi tơrŭm cheăng tung la ngiâ ƀă Việt Nam tung tâi tâng troăng hơlâ mơnhông tơrŭm cheăng ƀă ASEAN ƀă Châu Á – Thái Bình Dương.

Péa ngế kăn xiâm pơkuâ tơpui tơno, môi tuăn mâu troăng pơkâ, troăng hơlâ pêi pro vâ pơtối mơnhông tơrŭm cheăng kong têa tung la ngiâ Việt Nam – Brazil rế hía rế mot trâu hngế, ai pơxúa ƀă tơƀrê, xuân môi tiah tơpui tơno ‘na mâu tơdroăng tung kơpong ƀă a kong têa ê ki péa pâ vâ ‘nâi. Tối ‘na troăng ngăn mơnhông tơnêi têa, môi tuăn ƀă mâu tơdroăng ki kơnía hên tơdroăng cheăng, tơrŭm rơtế mơnhông, ƀă mơdêk hnoăng cheăng dêi mâu kong têa dế mơnhông a mâu troăng hơlâ pơkuâ ngăn lâp plâi tơnêi, péa ngế kăn pơkuâ môi tuăn thăm mơnhông tơrŭm ƀă tŏng gum dêi rơpó a mâu khu tơrŭm kong têa ê, hneăng hôp hên kơvâ cheăng ƀă tơrŭm tung kơpong.