Hdrối pơxiâm mot hơnăm hriâm nếo, Khu râ kăn pêi cheăng dêi Khu xiâm pơkuâ hnê hriâm ƀă hnê mơjiâng tuăn ngôa rơkê xua pôa Nguyễn Kim Sơn, Ngế xiâm pơkuâ hnê hriâm ƀă hnê mơjiâng tuăn ngôa rơkê pơkuâ djâ hiăng lăm séa ngăn tơdroăng hbrâ ăm hơnăm hriâm nếo ƀă diâp kơxuô tơmeăm ăm hok tro kơpong hơngế hơngo kong pơlê Dak Nông.

Vâ pêi pro hnoăng cheăng hơnăm hriâm nếo 2023 – 2024, pôa Nguyễn Kim Sơn pơkâ thế kong pơlê Dak Nông tơkŭm hnê mơhno ƀă pêi pro lĕm tro mâu troăng pêi môi tiah: tơmâng, mơ’no liăn hên tâ ăm hnê hriâm kơpong hơngế hơngo, kơpong hdroâng kuăn ngo; thăm veăng pêi pro tơdroăng rah xo ƀiên chê̆ thái cô vâ tơniăn kơxô̆ tiô kơlo pơkâ; pêi pro ƀeăn ƀĕng, rah xo tŭm thái cô, tơdâng tơ’mô, thăm mơ’no liăn rôe tŭm tơmeăm hnê hriâm; mơdêk pơ’lêh nếo tung hnê hriâm; xúa châ tơƀrê kơxô̆ mơngế pêi cheăng ƀă mơdêk pơ’lêh nếo tơmiât pêi rơkê, xúa ƀă mơnhông rơdêi khoa hok, kŏng ngê̆; tơkŭm pêi pro châ tơƀrê tơdroăng pêi pro tơdroăng hnê hriâm phôh thong nếo tiô tơdroăng:

“Hơnăm hriâm la ngiâ cho môi hơnăm hriâm ki kal, ki xiâm tung tơdroăng pơ’lêh nếo tơdroăng phôh thong. Tơdroăng cheăng kân tâ hên tâng pơchông ƀă mâu hơnăm hdrối, xua mê hiăng tơkŭm mê tơkŭm tâ, hiăng mơ-eăm mê khŏm mơ-eăm tâ. Vâ tơmiât la ngiâ troh tơdroăng châ tơƀrê má mơ’nui a hơnăm 2025 kêi đeăng tâi tâng tơdroăng pơ’lêh tiô tơdroăng hnê hriâm nếo ƀă hbrâ mâu tơdroăng vâ pêi pro tơdroăng hnê hriâm nếo ƀă râ mầm non’’.

Klăng roh séa ngăn tơdroăng hbrâ hơnăm hriâm nếo, pôa Nguyễn Kim Sơn hiăng lăm kơ-êng, mơhnhôk, diâp 2 toăng tơvi, 100 toăng rơxế mái ăm thái cô ƀă hok tro Hngêi trung râ má péa Hoàng Văn Thụ ƀă Hngêi trung râ má môi Nơ Trang Lơng, cheăm kơpong hơngế hơngo Quảng Sơn, tơring kơtiê Dak Glong.