VOV4.Xơ Đăng - Kơxo lơ 30/6, a tíu pêi cheăng xiâm Đảng, Khu xiâm kal kí, kăn hnê ngăn Đảng tơkŭm po Hôp tối mơgêi 10 hơnăm pêi tơdroăng hbrâ mơdât kâ kơluâ, pro ôh tá tro pơla hơnăm 2012-2022 ing hnoăng pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng, Ngế pơkuâ hnê mơhno xiâm Tơnêi têa ‘na hbrâ mơdât kâ kơluâ, pro ôh tá tro. Tơbleăng hnê mơhno a hneăng hôp, pôa Nguyễn Phú Trọng tối 6 ƀai hriâm ki kơnía, ki pơxúa tá tơpui kâ ƀă tá tơdroăng pêi pro khât; tung mê, thế hlê tŭm tâi tâng, trâu khât hnoăng cheăng, ki pơxúa, ki kal dêi tơdroăng cheăng tơplâ, hbrâ mơdât kâ kơluâ, ki pro ôh tá tro ai pơkâ ing hnoăng pơkuâ ngăn, hnê mơhno, tơkŭm, môi tuăn dêi Đảng, mê ai tơdrêng, đi đo cho Khu hnê mơhno cheăng xiâm ‘na hbrâ mơdât kâ kơluâ, pro ôh tá tro dêi Khu xiâm kal kí.

Pôa Nguyễn Phú Trọng, Kăn xiâm pơkuâ hnê ngăn Đảng pơkuâ hneăng hôp mơgêi 10 hơnăm pêi tơdroăng hbrâ mơdât kâ kơluâ, pro ôh tá tro

Tối troh hnoăng cheăng pêi tung la ngiâ, pôa Nguyễn Phú Trọng pơkâ thế, Khu hnê mơhno cheăng xiâm tơnêi têa, Khu hnê mơhno cheăng râ kong pơlê ƀă mâu kơ koan tung Khu xiâm tơnêi têa xuân môi tiah kong pơlê, kal pơtối mơ-eăm hên tâ nếo tung hnoăng cheăng pơ’lêh nếo, mơdêk ki tơ-brê, ki xêt khât, tơbrê pơxúa dêi tơdroăng hbrâ mơdât kâ kơluâ, pro ôh tá tro tung mâu hơnăm pơ’lêh nếo.

Gương tơplôu ƀă tơbleăng