VOV4.Xơ Đăng - Kơxo lơ 15/4,  xua pôa Nguyễn Phú Trọng, Kăn xiâm pơkuâ hnê ngăn Đảng  pơkuâ hneăng hôp, Khu xiâm kal kí, khu kăn hnê ngăn Đảng tơkŭm po hneăng hôp tâi tâng tung lâp tơnêi têa tối ‘na tơdroăng ƀă tơbleăng pêi Pơkâ 11 dêi khu xiâm kal kí ‘na troăng rơhlâ mơnhông mơdêk cheăng kâ rêh ối, tơniăn cheăng lêng kring tơniăn kơpong tơdế tơnêi têa ƀă kong ngo peăng Kơnhŏng troh hơnăm 2030 ƀă hvái ngăn troh hơnăm 2045.

Tâ tá hneăng hôp

Tối nhên mâu tơdroăng thế pêi ƀă pêi môi tiah lâi vâ  tơ-brê tơdroăng pơkâ Khu xiâm kal kí drêng kố, pôa Nguyễn Phú Trọng  tối nhên 5 tơdroăng  ƀă 14 to kong pơlê tung kơpong ƀă mâu khu xiâm kơvâ cheăng, tung mê kal hnê tối tŭm, tro ƀă trâu khât tâ tơdroăng pơkâ, ‘nâi nhên tơdroăng ki kal, tuăn tơmiêt hnê mơhno, mâu tơdroăng cheăng thế pêi. Pro ki môi tuăn dêi rơpó tung tâi tâng mâu râ, kơvâ cheăng, dêi kuăn pơlê ƀă khu mơdró ‘na hnoăng cheăng, tơdroăng ki kal dêi kơpong. Ing tơdroăng hlê plĕng ƀă tơleăng mơnhên tro, tơdroăng tơrŭm  pơla mơnhông mơdêk kơpong ƀă mơnhông mơdêk tơchoâm dêi tâi tâng tung tơnêi têa , kố cho  tơdroăng ki ai pơxúa khât ƀă kal khât mơhno hnoăng cheăng dêi tâi tâng Đảng ƀă tung lâp tơnêi têa ƀă kuăn ngo mâu hdroâng kuăn ngo tung kơpong ngo tơdế tơnêi têa, kong ngo peăng kơnhŏng.

Gương tơplôu ƀă tơbleăng