Khu hnê mơhno  tối, tung 6 khế apoăng hơnăm 2023 ƀă sap apoăng hneăng Hôp má 13 dêi Đảng troh nôkố, tơdroăng cheăng dêi Khu hnê mơhno pơtối châ pơ’lêh ‘na tơdroăng kal ƀă troăng pêi, ki hlo hên cho troăng rơhlâ pơkâ, tơdroăng vâ pêi châ tơbleăng pêi  khât, vâ châ tơƀrê nhên tung tơdroăng cheăng hbrâ mơdât kâ kơluâ, pro ôh tá tro. 

Mâu khế mơ’nui hơnăm 2023, Khu hnê mơhno pơkâ thế râ ủy, tơkŭm cheăng Đảng, kơ koan khu râ pơkuâ cheăng tơkŭm hnê mơhno, pêi tơƀrê mâu tơdroăng cheăng tiô Tơdroăng cheăng dêi tung hơnăm 2023 dêi khu Hnê mơhno ƀă tối nhên dêi Kăn xiâm pơkuâ hnê ngăn Đảng, Ngế pơkuâ hnê mơhno cheăng, tung mê ai tơkŭm a mâu tơdroăng cheăng môi tiah hnê mơhno pơtối mơdêk, mơjiâng, pê klêi tơdrêng luât hbrâ mơdât kâ kơluâ.

Ki kal cho rĕng pê klêi vâ luât ‘na séa ngăn hnoăng cheăng pêi, hbrâ mơdât kâ kơluâ tung mâu tơdroăng cheăng  ki tơ’lêi kâ kơluâ; ‘na kring vế mơngế ki tối tơbleăng ăm ‘nâi mâu tơdroăng ‘na ki kâ kơluâ, ki pro ôh tá tro. Hnê mơhno mơdêk séa ngăn, tí tăng ngăn, mâu tơdroăng cheăng ki tơ’lêi kâ kơluâ, ôh tá tro ƀă thâ pê klêi tơdroăng séa ngăn, riân ngăn mâu kơvâ cheăng tơ’lêi kâ kơluâ, tí tăng ngăn mâu tơdroăng tiô Pơkâ dêi Khu hnê mơhno.