Kơxo lơ 16/8/2023, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng, kăn xiâm pơkuâ khu hnê mơhno, pơkuâ po rôh hôp 24 Khu hnê mơhno Tíu xiâm ‘na hbrâ mơdât kâ kơluâ liăn ngân vâ tơpui tơno, ăm rơkong tơpui tối ‘na klêi kơ’nâi pêi cheăng dêi Khu hnê mơhno 6 khế apoăng hơnăm 2023 ƀă hvái ngăn hnoăng cheăng hbrâ mơdât kâ kơluâ sap ing apoăng hneăng hơnăm hneăng hôp 13 dêi Đảng troh nôkố.

Mơnhên hnoăng cheăng ki xiâm tung hnoăng cheăng dêi mâu khế mơ’nui hơnăm ƀă tung la ngiâ. Hdrối mê, hâi lơ 10/5, Khu hnê mơhno Tơnêi têa ‘na hbrâ mơdât kâ kơluâ (Khu hnê mơhno) tơkŭm po rôh hôp xua tơdroăng pơkuâ dêi pôa Nguyễn Phú Trọng.

A rôh hôp kố, Khu hnê mơhno pơkâ thế rêm râ Đảng, khu tơrŭm Đảng, kơ koan ki ai tơdjâk troh pơtối mơdêk hnoăng cheăng tơplâ mơdât kâ  kơluâ ƀă hiâm mơno “khŏm mơ-eăm, kơhnâ, ôh tá pơtê, ôh tá ai kơpong mơdât, môi tiah tâi tâng, maluâ ngế ki mê cho kơbố”, tơbleăng pêi pro tơƀrê mâu hnoăng cheăng hbrâ mơdât kâ kơluâ tiô Mơgêi Rôh hôp má 23 dêi Kăn xiâm pơkuâ hnê ngăn Đảng, ngế xiâm pơkuâ Khu hnê mơhno ƀă Tơdroăng cheăng hơnăm 2023 dêi Khu hnê mơhno.