Bo cheăng Lâp lâp plâi tơnêi Hữu Nghị ối a troăng kân 1A, kơtăn ing pơlê kong kơdrâm Lạng Sơn 17 km vêh peăng kơnhŏng, kơtăn Hà Nội 171 km vêh peăng mâ hâi lo ‘na kơnhŏng. Tíu ki po hên mâu tơdroăng cheăng tê mơdró, roê ‘mot kế tơmeăm ngi kong têa ê pơla Việt Nam ƀă Sinuâ.

A Bo cheăng lâp plâi tơnêi Hữu Nghị ai môi to tơneăn 1116 kơtúa hlá cơ dêi Kŏng hòa xah hô̆i chuh nghiah Việt Nam dêi Tơnêi têa, kố cho tíu ki apoăng dêi troăng kân 1A tơdjêp Lạng Sơn ƀă Mũi Cà Mau. Bo cheăng lâp plâi tơnêi Hữu Nghị cho tíu ki kal tung tơdroăng cheăng kâ, veăng kum mơdêk cheăng kâ pơla Việt Nam ƀă Sinuâ rơtế ƀă mâu kong têa tung kơpong ASEAN.

Troăng cheăng kâ xiâm ai: Nam Ninh – Lạng Sơn – Hà Nội – Hải Phòng tiô môi tiah tơkêa pơla kăn pơkuâ dêi péa tơnêi têa. Akố pôa Nguyễn Phú Trọng, Kăn xiâm pơkuâ hnê ngăn Đảng hiăng kơ-êng mơhnhôk ƀă hbru tơmeăm ăm khu tơrŭm cheăng pêi cheăng a kơpong bo cheăng.

Drêng kố pôa Nguyễn Phú Trọng tơpui tơno ‘nâng ‘nâi ƀă kăn teăng mâ Sinuâ a Việt Nam Hùng Ba. Pôa Nguyễn Phú Trọng pơkâ  thế, kong pơlê Lạng Sơn ƀă khu ki ai tơdjâk troh a Bo cheăng lâp plâi tơnêi Hữu Nghị pơtối mơdêk, veăng kum tơƀrê tâ nếo, veăng kum mơdêk tơrŭm cheăng pơla Việt Nam – Sinuâ rế hía rế mơnhông. Hdrối mê, apoăng chôu kơxê lơ 25/8, pôa Nguyễn Phú Trọng rơtế ƀă khu kăn ki pêi dêi hnoăng cheăng hiăng troh pôu hbru tơmeăm ăm rơpŏng pôa Nguyễn Xuân Khoát, kăn ƀô̆ kăch măng ton nah ƀă rơpŏng jâ Bạch Thị Khôi kăn ƀô̆ ki pơxiâm tơplâ a pơlê kong kơdrâm Lạng Sơn.