A rôh tơdah, pôa Nguyễn Phú Trọng tối Việt Nam đi đo nhoăm ki môi tuăn, veăng kum kơnía git, tuăn mơno pâ dêi kuăn pơlê Liên Xô ƀă kuăn pơlê Rusi hiăng ‘măn ăm Việt Nam tung mâu khế hơnăm tơplâ tơplong xuân cho môi tung mâu tơdroăng mơjiâng ƀă kring vế tơnêi têa xo ah hmôi, tối ki nhoăm ƀă tơdroăng tơrŭm tiah hmâ ton nah, Khu tơrŭm cheăng tung tŭm tơdroăng ƀă Rusi.

Đảng Kŏng sản Việt Nam ngăn tơdroăng mơnhông mơdêk ƀă mâu khu xiâm đảng a kong têa Rusi. Pôa Nguyễn Phú Trọng tối mâu troăng rơhlâ pêi ki kân vâ pơtối mơdêk tơrŭm cheăng pơla Việt Nam - Rusi tung la ngiâ. Kăn xiâm hnê ngăn Kuô̆k hô̆i Kong têa Rusi tối, Rusi đi đo ngăn Việt Nam cho tơnêi têa tơrŭm pêi apoăng, ki kal tung luât pơkâ tơpui kâ dêi tơná a kơpong châu Á - Thái Bình Dương.