VOV4.Xơ Đăng - Kơxê lơ 20/5, a Tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơdah pôa Tan Chuan-jin, Kăn xiâm hnê ngăn Kuô̆k hô̆i kong têa Singapore ƀă khu râ kăn teăng mâ Kuô̆k hô̆i kong têa Singapore dế lăm pôu pêi cheăng a Việt Nam. Pôa Tan Chuan-jin tối phiu ro roh apoăng lăm pôu pêi cheăng a Viêt Nam, châ hlo mâu tơdroăng kân kĭn tung mơnhông cheăng kâ – rêh ối pơlê pơla dêi Việt Nam.

Kăn xiâm hnê ngăn Kuô̆k hô̆i kong têa Singapore tơbleăng tối ƀă Kăn xiâm pơkuâ hnê ngăn Đảng tơnêi têa pin ‘na tơdroăng châ tơƀrê roh trâm mâ tơpui tơno ƀă pôa Vương Đình Huệ, Kăn xiâm hnê ngăn Kuô̆k hô̆i, tung mê, ai tơdroăng péa pâ hiăng kĭ mơ-éa chôu vế ‘na tơrŭm cheăng, môi tuăn thăm tơpui tơno, trâm mâ pơla mâu kăn Kuô̆k hô̆i râ má môi, tơrŭm cheăng pơla Vi ƀan pêi cheăng, tối ‘na túa ki rơkê tơtro tung mâu kơvâ pêi cheăng dêi Kuô̆k hô̆i péa tơnêi têa ƀă tơrŭm tung mâu hneăng hôp tơpui tơno dêi lâp plâi tơnêi.

Pôa Nguyễn Phú Trọng phiu ro roh lăm pôu pêi cheăng Việt Nam dêi Kăn xiâm hnê ngăn Kuô̆k hô̆i kong têa Singapore, tối loi tơngah roh lăm pôu pêi cheăng kô cho tơdroăng vê hdró ki kal tung pơla péa tơnêi têa dế tơmiât troh leh tơbâ 50 hơnăm mơjiâng tơrŭm tơpui kâ ƀă kong têa ê ƀă 10 hơnăm mơjiâng tơrŭm cheăng ton xŏn pơla péa tơnêi têa a hơnăm 2023.

A Sa Ly tơplôu ƀă tơbleăng