A rôh tơdah, pôa Nguyễn Phú Trọng, Kăn xiâm pơkuâ hnê ngăn Đảng tối: Đảng, Tơnêi têa ƀă kuăn pơlê Việt Nam đi đo púi vâ mơdêk tơrŭm cheăng ƀă Mông Cổ cho kong têa pú hmâ sap nah rế mơnhông tơƀrê tâ tung mâu kơvâ cheăng, tơtro ƀă ki pơxúa, tơmeăm ai hlâu ƀă tơdroăng kal vâ dêi péa tơnêi têa.

Pôa Nguyễn Phú Trọng tối, loi khât hneăng lăm pôu Việt Nam dêi Kăn xiâm pơkuâ kong têa Mông Cổ kô veăng ‘no hnoăng mơdêk rơdêi tâ nếo tơrŭm cheăng tiah hmê ton nah pơla péa tơnêi têa, malối tung pơla péa tơnêi têa dế rơtế ƀă pêi mâu tơdroăng cheăng vâ troh hâi tơbâ 70 hơnăm mơjiâng tơrŭm cheăng tơpui kâ pơla Việt Nam - Mông Cổ a hơnăm 2024.

Kơxê lơ 1/11, klêi kơ’nâi roh tơpui tơno, pôa Võ Văn Thưởng, Kăn xiâm hnê ngăn tơnêi têa ƀă Kăn xiâm pơkuâ kong têa Mông Cổ hiăng trâm mâ khu chêh hlá tơbeăng, tối ‘na tơdroăng châ tơƀrê hneăng hôp tơpui tơno. Tung tơdroăng tơrŭm tiô khôi vâi krâ nah lĕm tro, Kăn xiâm hnê ngăn tơnêi têa tối, tung la ngiâ, tơrŭm cheăng Việt Nam – Mông Cổ kô pơtối châ pro krá tơniăn, mơnhông, tơmiât la ngiâ mơjiâng tơdroăng tơrŭm cheăng nếo.

Xông tơpui a hôp khu chêh hlá tơbeăng, pôa Võ Văn Thưởng, mơnhên, tơrŭm cheăng nhŏng o ƀă tơrŭm tiô khôi vâi krâ nah pơla péa tơnêi têa Việt Nam – Mông Cổ dế mơnhông mơdêk lĕm, châ tơƀrê hên nếo tung pơla achê kố, ki má lối cho mâu tơdroăng châ tơƀrê tung kơvâ kal kí, cheăng lêng, gâk kring ƀă cheăng kâ.

Vâ djâ tơrŭm cheăng péa tơnêi têa mơnhông mơdêk trâu rơdâ, păng ‘nâng ƀă châ tơƀrê tung la ngiâ, Kăn xiâm hnê ngăn tơnêi têa tối ăm ‘nâi hiăng môi tuăn ƀă Kăn xiâm pơkuâ kong têa Mông Cổ hên troăng pêi ki kal, tung mê, môi tuăn mơdêk pơkâ xiâm mơdêk châ péa xôh pêi lo liăn tê mơdró pơla péa pâ to a kơlo 200 rơtuh dollars tung mâu hơnăm la ngiâ.

Hdrối mê, pôa Võ Văn Thưởng, Kăn xiâm hnê ngăn tơnêi têa ƀă Kăn xiâm pơkuâ kong têa Mông Cổ hiăng châ hlo leh kĭ tơkêa mâu mơ-éa ki kal tơrŭm cheăng pơla mâu khu xiâm, kơvâ péa tơnêi têa.