A rôh tơdah, pôa Nguyễn Phú Trọng phiu ro pôa Lý Hiển Long, Ngế pro xiâm hnê ngăn kong têa ƀă Khu râ kăn xiâm Singapore pôu Việt Nam klăng a rôh péa tơnêi têa tơbâ 50 hơnăm mơjiâng tơrŭm cheăng tơpui kâ ƀă 10 hơnăm mơjiâng tơrŭm kong têa tung la ngiâ. Kăn xiâm pơkuâ hnê ngăn Đảng xuân tối phiu ro ‘na tơdroăng mơnhông dêi tơrŭm cheăng dêi péa tơnêi têa, tối nhên, ngăn nhuô̆m ‘na tơdroăng ki thăm mơdêk tơrŭm cheăng ƀă Singapore cho kong têa ki a chê ai tíu cheăng ki kal a kơpong ƀă kong têa ê.

Pôa Lý Hiển Long tối tơbleăng ăm kăn xiâm pơkuâ hnê ngăn Đảng klêi kơ’nâi tơpui tơno ƀă pôa Phạm Minh Chính, Ngế pro xiâm hnê ngăn tơnêi têa ƀă mâu kăn pơkuâ Việt Nam; môi tuăn ƀă mâu tơdroăng pơkâ thế dêi pôa Nguyễn Phú Trọng ‘na tơrŭm cheăng, ngăn mê cho mâu troăng tơmiât tung la ngiâ ki kal ăm tơrŭm cheăng pơla péa tơnêi têa tung la ngiâ.

Xuân tung hâi lơ 28/8, a Tíu pêi cheăng Kăn xiâm hnê ngăn tơnêi têa, pôa Võ Văn Thưởng, Kăn xiâm hnê ngăn tơnêi têa hiăng tơdah pôa Lý Hiển Long, Ngế pro xiâm hnê ngăn kong têa Singapore. Péa ngế kăn pơkuâ tối hlo mâu tơdroăng mơnhông trâu hngế ƀă hên tơdroăng ki tơrŭm tơƀrê ƀă tơdroăng ki kal tung tơrŭm cheăng pơla péa tơnêi têa tung plâ 50 hơnăm hdrối, malối cho tơrŭm cheăng kâ, gâk kring, hnê hriâm, hnê cheăng pêi.