1.VOV4.Xơ Đăng - Kơxê lơ 15/4, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơpui phôn khu râ kăn xiâm ƀă Ngế pro xiâm hnê ngăn kong têa Kŏng hoa Ấn Độ, kăn pơkuâ Đảng Ấn Độ pôa Narendra Modi. A roh tơpui phôn, pôa Naredra Modi, Ngế pro xiâm hnê ngăn kong têa Ấn Độ mơnhên Việt Nam cho môi khu tơrŭm ki kal tung troăng hơlâ tơpui kâ dêi Ấn Độ, ki rơhêng vâ tóoi cho troăng hơlâ ‘’Pêi cheăng tiô troăng mâ hâi lo’’, mơhno tơdroăng tuăn pâ lĕm tro ƀă kong têa ƀă kuăn pơlê Việt Nam.

Pôa Nguyễn Phú Trọng, Kăn xiâm pơkuâ hnê ngăn Đảng tơpui phôn ƀă Ngế pro xiâm hnê ngăn kong têa Ấn Độ

Pôa Nguyễn Phú Trọng mơnhên tơrŭm tơrŭm cheăng tiô khôi hmâ vâi krâ Việt Nam - Ấn Độ châ mâu rơxông kăn pơkuâ ƀă kuăn pơlê péa tơnêi têa mơ’no ivá  pro krá tơniăn lĕm tâ ƀă mơnhông mơdêk; tơdroăng ki rŭm trâu hơhngế ‘na tơdroăng mơnhông mơdêk ƀă khôi túa lĕm tro, mâu tơdroăng ki pơxúa tơdjuôm tung hên tơdroăng lâp plâi tơnêi ki kal pro xiâm kối ăm tơrŭm cheăng ƀă tơdroăng môi tuăn dêi pó. ‘Na têa kơxĭ Biển Đông, péa pâ môi tuăn ‘na tơdroăng ki kal dêi tơdroăng rak hơniêp lĕm, tơniăn, tơrŭm, mơnhông mơdêk ƀă nhuô̆m luât lâp plâi tơnêi, tung mê ai Mơ-éa tơkêa hơnăm 1982 dêi Khu lâp kong têa ‘na Luât têa kơxĭ, nhuô̆m hnoăng pơkuâ, hnoăng pơkuâ dêi mâu kong têa ƀă hnoăng tơniăn pơto tơmeăm troăng tơƀai, têa kơxĭ.

A Sa Ly tơplôu ƀă tơbleăng