VOV4. Xơ Đăng - Kơxo lơ 8/6, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng hiăng tơkŭm po tơpui tơno khu râ kăn xiâm ƀă pôa Yoon Suk-yeol, Kăn xiâm pơkuâ kong têa Hàn Quốc ƀă troăng mơ’no tơdrêng tung um tiô troăng hyôh măng.

Pôa Nguyễn Phú Trọng, Kăn xiâm pơkuâ hnê ngăn Đảng

Tung tơdroăng trâm mâ ƀă tơrŭm cheăng, péa kăn xiâm kheăn kơdeăn ki kal dêi roh hôp khu râ kăn xiâm, ki má lối cho roh péa tơnêi têa leh tơbâ 30 hơnăm hâi mơjiâng tơrŭm cheăng tơpui kâ. Pôa Yoon Suk-yeol rơkâu mâu tơdroăng châ tơƀrê tŭm têk ‘na mơnhông mơdêk, hnoăng ƀă tíu cheăng lâp plâi tơnêi rế hía rế a ‘ngêi dêi Việt Nam.

Tâi tâng a roh tơpui tơno

Pôa Nguyễn Phú Trọng mơnhên nhuô̆m ƀă tơdroăng tơrŭm cheăng ton xŏn pơla Việt Nam – Hàn Quốc; kheăn kơdeăn tơdroăng tŏng kum dêi Hàn Quốc tung tơdroăng mơnhông mơdêk a Việt Nam, tung mê ai tơdroăng tơrŭm hbrâ mơdât pơreăng COVID-19. Péa kăn xiâm môi tuăn thăm trâm mâ khu râ kăn xiâm; mơnhông mơdêk tơrŭm cheăng tung kơvâ cheăng lêng, gâk kring; thăm tơrŭm mơhno khôi túa lĕm tro, tơrŭm cheăng pơla mâu kong pơlê ƀă hía hé.

A Sa Ly tơplôu ƀă tơbleăng