Pôa Nguyễn Phú Trọng hiăng troh ai mâ, tơpui tơno a roh leh mê. Nhoăm mơnê ƀă diâp mê dai 60 hơnăm Đảng ƀă pleăng kơpâu reăng rơkâu hâk pôa Nông Đức Mạnh, mê pôa Nguyễn Phú Trọng vêh mơnhên tối, pôa Nông Đức Mạnh cho kăn ƀô̆ hdroâng kuăn ngo, kot mâ ƀă xông kân ing môi pơlê kong ngo peăng Kơnhŏng ai hên troăng hơlâ ki mơjo pâ tơnêi têa, pâ kăch măng, hiăng tơkâ luâ hên tung pôu râng hnoăng pơkuâ cheăng ing pơlê cheăm troh a Kăn pơkuâ hnê ngăn Đảng kong pơlê, Kăn xiâm hnê ngăn Kuô̆k hô̆i hneăng 10 ƀă Kăn xiâm pơkuâ hnê ngăn Đảng hneăng 9, hơnăm 2001-2006, hneăng 10, hơnăm 2006-2011.

Maluâ pêi pro hnoăng cheăng ki lâi, pôa Nông Đức Mạnh xuân đi đo môi hiâm mơno ƀă Đảng, ƀă Tơnêi têa ƀă kuăn pơlê; krá kâk tung rak vế tiô hiâm mơno, troăng hơlâ dêi Đảng; ôh tá lôi pơtê tung hriâm tâp, đi đo mơhriâm pât, ‘mâi rơnêu tơdroăng ki kal, ki nếo, khŏm mơ-eăm pêi pro klêi hnoăng cheăng hiăng châ pơcháu.