VOV4.Xơ Đăng - Kơxê lơ 8/7, a tíu pêi cheăng xiâm Đảng, ing pơkuâ dêi pôa Nguyễn Phú Trọng, Kăn xiâm pơkuâ hnê ngăn Đảng, Khu xiâm kal kí, Khu pơkuâ hnê ngăn cheăng Đảng hiăng hôp, séa ngăn mâu tơdroăng ki má môi dêi tơnêi têa, tơdroăng lâp plâi tơnêi tung pái khế (4,5,6) ƀă 6 khế apoăng hơnăm 2022; hnoăng cheăng xiâm tung la ngiâ. Khu xiâm kal kí, Khu pơkuâ hnê ngăn cheăng Đảng mơnhên, tung la ngiâ tơnêi têa pơtối trâm hên tơdroăng pá puât, pơloăng mơnúa, kô chiâng vêh pro hrá tơdroăng rak tơniăn ƀă mơnhông cheăng kâ – rêh ối pơlê pơla xua ôh tá ‘nâi tối hdrối dêi tơdroăng cheăng kâ – kal kí lâp plâi tơnêi, tơplâ tơplong Rusi – Ukraina cho ôh tá tơniăn; tơxup tơbriât, tơplâ pơla mâu kong têa kân rế hía rế ó; tơdroăng liăn chu rơpâ yă, yă têa châu têa kơxăng to kơnâ, tơdroăng pro kơtăn troăng hơlâ liăn ngân a hên kong têa, tơdroăng tơniăn tơdroăng khăm, pơlât ƀă rak ngăn ivá kuăn pơlê.

Pôa Nguyễn Phú Trọng, Kăn xiâm pơkuâ hnê ngăn tơpui mơgêi a hneăng hôp

Khu xiâm kal kí, Khu pơkuâ hnê ngăn Đảng pơkâ mâu râ, mâu kơvâ cheăng, tơkŭm po hriâm tâp, hlê plĕng tum, pơtâng tối ƀă po rơdâ pêi pro teăm tơdrêng, châ tơƀrê mâu pơkâ Hneăng hôp roh má pơtăm Khu xiâm pơkuâ Đảng hneăng má XIII.

A Sa Ly tơplôu ƀă tơbleăng