VOV4.Xơ Đăng - Kơxo lơ 27/4, a Tíu pêi cheăng xiâm Đảng Khu hnê mơhno cheăng Tơnêi têa ‘na hbrâ mơdât, kâ kơluâ liăn ngân ối tung Khu hnê mơhno cheăng hiăng tơkŭm po rôh hôp tơpui tơno, ăm rơkong veăng tơpui tối pơkâ thế mơnhên mâu rôh ki pro xôi, mâu tơdroăng ki ối tung Khu hnê mơhno cheăng séa ngăn, pơkâ thế sap ing klêi kơ’nâi Rôh hôp má 21 dêi Khu hnê mơhno cheăng troh nôkố, mơnhên pơkâ thế hnoăng cheăng hbrâ mơdât kâ kơluâ liăn ngân tung la ngiâ.

Sap ing apoăng hơnăm troh nôkố, hnoăng cheăng hbrâ mơdât kâ kơluâ liăn ngân pơtối châ tơmâng ngăn, pơkuâ, hnê mơhno, mơdêk rơdêi ƀă ai mâu tơdroăng ki hơ’lêh nếo. ‘Na hnoăng cheăng tung la ngiâ, Khu hnê mơhno cheăng pơkâ thế rêm râ Đảng, khu tơrŭm cheăng, kơ koan ki ai tơdjâk kal pơtối mơdêk tâ nếo ƀă khŏm mơ-eăm, pêi pro rơdêi, kơhnâ, tơdrêng tâ, khŏm mơ-eăm, kơhnâ, ôh tá la lâi pơtê, tung tơdroăng ki hbrâ mơdât kâ kơluâ liăn ngân; hbrâ rơnáu tăng rup, pơxâu phâk kơtăng mâu ngế ki kâ kơluâ pro ôh tá tro tung đảng viên mâu ngế pơkuâ, mâu ngế cheăng.

Katarina Nga tơplôu ƀă tơbleăng