VOV4.Xơ Đăng - Kơxê lơ 6/6, a tíu pêi cheăng Khu xiâm Đảng, pôa Nguyễn Phú Trọng, kăn xiâm pơkuâ hnê ngăn cheăng Đảng hiăng tơpui tơno ƀă kăn xiâm hnê ngăn Đảng Măt trâ̆n Tơleăng lĕm kong têa Mozambique (FRELIMO), kăn xiâm pơkuâ kong têa Mozambique cho pôa Filipe Jacinto Nyusi ƀă tơdroăng ki tơpui tơno ing troăng hyôh Internet.

Tung tơdroăng ki tơrŭm, kăn xiâm hnê ngăn Đảng FRELIMO, kăn xiâm pơkuâ ngăn Mozambique mơnhên tối khât ki pơxúa, ki kal dêi rôh tơpui phôn tung tơdroăng ki mơdêk tơrŭm tơroâ, tơrŭm tơniăn lĕm pơla péa Đảng, péa tơnêi têa. Pôa Nguyễn Phú Trọng tối nhên, Mozambique cho môi tung mâu tơnêi têa Việt Nam kơjo má môi mơdêk tơrŭm cheăng a châu Phi.

Tâ tá rôh tơpui phôn ‘no tơdrêng ing troăng hyôh Internet

Kăn pơkuâ péa Đảng, péa tơnêi têa môi tuăn pơtối mơdêk tơrŭm cheăng pơla péa Đảng Kŏng san Việt Nam ƀă Đảng FRELIMO rak vế hnoăng cheăng pơkâ troăng tung tơdroăng mơnhông tơrŭm cheăng hên kơvâ cheăng pơla péa tơnêi têa rế hía rế ai pơxúa ƀă tơƀrê; tí tăng tro ki ai hlâu ƀă ki rơdêi dêi rêm pâ vâ mơdêk tơrŭm cheăng kal kí, tơpui kâ, cheăng kâ, tê mơdró, gâk kring, hnê hriâm, hnê cheăng cheăng pêi, ôm hyô, mơhno túa lĕm tro ƀă trâm mâ kuăn pơlê ƀă hên ki ê.

Katarina Nga tơplôu ƀă tơbleăng