VOV4.Xơ Đăng -  Kơxê lơ 14/4, Kăn xiâm pơkuâ tơdroăng loi tĭng tiô khôp tơnêi têa hiăng ai roh pêi cheăng ƀă Khu pơkuâ cheăng Đảng kong pơlê Quảng Ngãi. Tiô tơbleăng, Pái khế apoăng hơnăm kố, tâi tâng xo hnoăng liăn ngân tơnêi têa tung kong pơlê Quảng Ngãi hiăng châ lối 8.600 rơtal liăn, tâk 56,5% tâng pơchông ƀă roh kố hơnăm nah. Kơvâ pêi chiâk deăng pơtối rak kơlo tơtêk, mơhno tơdroăng mơjiâng tơmeăm kơmăi kơmok pái khế apoăng hơnăm tâk 6,8% tâng pơchông ƀă hơnăm nah.

Tâi tâng a roh pêi cheăng

Pêi lo liăn tê tơmeăm ngi kong têa ê châ 533 rơtuh dolar, tâk 27,2% tâng pơchông ƀă roh kố hơnăm nah. Thươ̆ng tươ̆ng Nguyễn Trọng Nghĩa, Kăn xiâm pơkuâ hnê ngăn cheăng Đảng, Kăn xiâm pơkuâ tơdroăng loi tĭng tiô khôp  kheăn kơdeăn mâu tơdroăng châ tơƀrê ki kal dêi Đảng ƀô̆, khu râ kăn pwkuâ ƀă kuăn pơlê kong pơlê Quảng Ngãi châ tơƀrê tung pơla kố nah; tơdrêng amê pơkâ thế kong pơlê Quảng Ngãi mơ-eăm hên tâ mê nếo vâ châ tơƀrê hên môi tiah Pơkâ hneăng hôp mâu kăn teăng mâ Đảng ƀô̆ kong pơlê roh má XX hiăng mơ’no. Roh kố, Kăn xiâm pơkuâ tơdroăng loi tĭng tiô khôp Tơnêi têa rơtế khu râ kăn pêi cheăng hiăng troh chô nhâng, pleăng rơvĭu reăng a Tíu koh tơbâ Ngoh khên tơnôu hdroâng mơngế Trương Định; kơpong ai tơmeăm tơbâ tơdroăng ton nah Sơn Mỹ; Kơpong tơnâp Hngêi lêng pâ nhuô̆m tơnêi têa Huỳnh Thúc Kháng.

A Sa Ly tơplôu ƀă tơbleăng