Mơnhên a rôh pêi cheăng, pôa Nguyễn Trọng Nghiã, Kăn xiâm pơkuâ hnê ngăn Đảng, Ngế xiâm mơhnhôk cheăng kal kí Tơnêi têa  tối; Tung plâ pêi hnoăng cheăng kăch măng, tơdroăng mơhno túa lĕm tro đi đo châ Đảng pin tơmâng khât. Malối, sap apoăng hneăng hôp má 13 troh nôkố, tơdroăng ‘na túa lĕm tro thăm tơmâng hên tâ. Mâu tơdroăng veăng hnê tối tơpui tơno a rôh pêi cheăng châ tối rơhéa tâng vâ ngăn ƀă tơdế hneăng pêi tiô Pơkâ Hneăng hôp má 13 dêi Đảng.

Tung mê, ki xiâm cho túa lĕm tro mơngế ‘na kuăn mơngế tiô hneăng hôp má 13 ƀă mâu pơkâ dêi Tíu xiâm. Tung la ngiâ, Khu xiâm ngăn Túa lĕm tro Tơ’noăng ivá ƀă Ôm hyô pơtối tăng ‘nâi plĕng trâu tâ mơdêk hlê plĕng tŭm, trâu tâ nếo ‘na mơhno túa lĕm tro tiô tơdroăng pơkâ Hneăng hôp 13, mơnhông túa lĕm tro tiô troăng rơhlâ dêi Đảng hiăng pơkâ, đi đo tiô troăng tơniăn tơtro, tung mê kuăn mơngế  rak ki xiâm, mâu văn ngê̆ sih pêi hnoăng cheăng ki kal.