VOV4.Xơ Đăng - Kơxo lơ 6/6, a pơlê kong kơdrâm Hạ Long, kong pơlê Quảng Ninh, pôa Nguyễn Xuân Phúc, Kăn xiâm pơkuâ hnê mơhno mơjiâng tơdroăng tơkêa bro pơkuâ Hneăng hôp veăng tơpui tối dêi mâu khu râ kăn pơkuâ hnê ngăn cheăng Đảng kong pơlê, khu râ kăn pơkuâ cheăng Đảng pơlê kong kơdrâm ối tung Tơnêi têa (kơpong peăng Kơnhŏng) ƀă tơdroăng tơkêa bro’’ Troăng pêi ton xŏn mơjiâng ƀă kêi đeăng Tơnêi têa tiô luât xah hô̆i chuh nghiah Việt Nam troh hơnăm 2030, pêi pro troh hơnăm 2045’’.

Pôa Nguyễn Xuân Phúc, Kăn xiâm hnê ngăn pơkuâ Hneăng hôp veăng tơpui tối tơdroăng tơkêa bro mơjiâng Tơnêi têa tiô luât xah hô̆i chuh nghiah

A hneăng hôp, mâu kong pơlê, pơlê kong kơdrâm kơpong peăng Kơnhŏng môi tuăn ƀă mâu roh mơnhông mơdêk châ tối tung Tơdroăng tơkêa bro, tung mê thăm xing xoăng râ, xing xoăng hnoăng, tơdrêng amê pơkâ kal pêi nhên tâ tung tơdroăng tơkêa bro ‘na tơrŭm cheăng pơla Tơnêi têa ƀă khu râ kăn pơkuâ ƀă troăng pêi ki nhên vâ thăm xing xoăng râ, xing xoăng hnoăng tơdâng tơ’mô, mơdêk ki pơkuâ xêh, pôu râng hnoăng cheăng.

Xông tơpui mơgêi Hneăng hôp, pôa Nguyễn Xuân Phúc kheăn kơdeăn mâu kong pơlê, khu râ kăn pơkuâ cheăng Đảng pơlê kong kơdrâm kơpong peăng kơnhŏng hiăng ai hên rơkong tơpui tối tá hiâm mơno ƀă môi tuăn ƀă tơdroăng tơkêa bro, tơdrêng amê, pơkâ thế mâu kong pơlê, khu râ kăn pơkuâ cheăng Đảng pơlê kong kơdrâm pơtối hriăn plĕng tơdroăng tơkêa bro vâ ai hên rơkong veăng tơpui tối ‘na tơdroăng tơkêa bro.

A Sa Ly tơplôu ƀă tơbleăng