VOV4.Xơ Đăng - Kơxo lơ 15/6, pôa Nguyễn Xuân Phúc, Kăn xiâm hnê ngăn tơnêi têa pêi cheăng ƀă Khu kăn Đảng ủy kong pơlê Quảng Bình. Klêi tơmâng kăn hnê ngăn kong pơlê tơbleăng ƀă mâu kăn bô̆ mâu kăn kơvâ cheăng veăng hnê tối a rôh pêi cheăng, pôa Nguyễn Xuân Phúc, Kăn xiâm hnê ngăn tơnêi têa khěn kơdeăn, pơla hdrối kố nah, Đảng ƀô̆, mâu kăn ƀă kuăn pơlê tung kong pơlê hiăng pơtối rak vế ki tơrŭm môi tuăn, pêi tro tiô pơkâ hneăng hôp Đảng ƀô̆ kong pơlê roh má 17, mơ-eăm djâ kong pơlê mơnhông mơdêk ƀă tơdroăng pêi nhên khât. Quảng bình ai tŭm ivá  mơdêk pro tơraih tơ-ƀai, kơno tuk, ai tơmeăm khoăng kong kế dêi lâp plâi tơnêi, ai tíu tơkăng kong, kal ai mâ ngăn ton ta ah tung tơdroăng mơnhông kong pơlê. 

Pôa Nguyễn Xuân Phúc, Kăn xiâm hnê ngăn tơnêi têa pêi cheăng ƀă Khu kăn Đảng ủy kong pơlê Quảng Bình

Tung rôh hôp tơbleăng mơnhông cheăng kâ tâi tâng tơdroăng, pôa Nguyễn Xuân Phúc tối tiah kố, kong pơlê kal tơkŭm 4 trăng cho  ôm hyô, pêi chiâk rơkê plĕng, mơnhông cheăng ƀă kơmăi kơmok ƀă mơnhông mơdêk krá tơniăn cheăng kâ a têa kơxĭ. Tung mê, thế tơtrŏng troh kuăn pơlê tung kong pơlê ai kơxô̆ hên ngế rêh ối a kơpong pêi chiâk, a thôn pơlê.

Gương tơplôu ƀă tơbleăng