VOV4.Xơ Đăng - Kơxo lơ 21/4, a Hà Nội, pôa Nguyễn Xuân Phúc, Kăn xiâm hnê ngăn tơnêi têa pin hiăng pêi cheăng bă Khu xiâm pơkuâ khu mơngế pêi luât krê Việt Nam. Kăn xiâm hnê ngăn tơnêi têa kheăn kơdeăn păng ‘nâng Khu pêi luât Việt Nam ‘na mâu tơdroăng châ tơƀrê, tơdrêng amê mơnhên, Đảng, Tơnêi têa đi đo tơmâng tŏng kum phá tơ-ê troh khu pêi cheăng ƀă tơdroăng cheăng dêi khu.

Pôa Nguyễn Xuân Phúc, Kăn xiâm hnê ngăn tơnêi têa pêi cheăng ƀă Khu pêi ‘na luât tơnêi têa Việt Nam

Kăn xiâm hnê ngăn tơnêi têa pơkâ thế, Đảng đoân ƀă Khu xiâm pơkuâ mơngế pêi luât Việt Nam kal pơtối tơmâng hnê mơhno mâu khu râ pêi pro mâu troăng hơlâ, troăng pơkâ pêi dêi Đảng, xiâm kối cho Pơkâ 56 dêi Khu xiâm kal kí, mơnhông hnoăng dêi khu cheăng kal kí, tơniăn tơdroăng pêi châ tơƀrê tiô pơkâ. Pôa Nguyễn Xuân Phúc xuân pơkâ thế Khu pêi luât pơtối thăm pơtâng tối troăng hơlâ dêi Đảng, troăng hơlâ luât dêi tơnêi têa ăm khu tơrŭm cheăng ƀă kuăn pơlê, mơdêk nhuô̆m luât ƀă pêi tiô luât.

A Sa Ly tơplôu ƀă tơbleăng