VOV4.Xơ Đăng - Kơxo lơ 20/6, a kong pơlê Bình Dương, pôa Nguyễn Xuân Phúc, Kăn xiâm hnê ngăn tơnêi têa, Ngế pơkuâ hnê mơhno mơjiâng tơdroăng tơkêa bro ‘’tơdroăng mơnhông mơdêk ƀă pê klêi tơnêi têa tro tiô luât xah hô̆i chuh ngiah Việt Nam troh hơnăm 2030, troăng rơhlâ troh hơnăm 2045’’ pơkuâ hneăng hôp xo tơmâng tơdroăng veăng hnê khĕn dêi mâu kăn Đảng ủy kong pơlê, pơlê kong kân tung kơpong peăng Hdroh tung Hlá mơ-éa chêh tơdroăng tơkêa bro.

Pôa Nguyễn Xuân Phúc, Kăn xiâm hnê ngăn tơnêi têa pơkuâ hneăng hôp tơmâng xo tơdroăng hnê khĕn mơjiâng tơnêi têa tro tiô luâ

Mâu kong pơlê kơpong peăng Hdroh pâ thế chêh tung hlá mơ-éa tơkêa kal ai troăng rơhlâ pê klêi xoăng hnoăng, râ kăn pơla tíu xiâm ƀă kong pơlê rơdêi tâ, nhên tâ nếo. Tơpui a hneăng hôp, Kăn xiâm hnê ngăn tơnêi têa khĕn kơdeăn mâu tơdroăng hnê tối dêi mâu kong pơlê, khu kăn Đảng ủy ai hnoăng cheăng pêi nhên khât, tơdrăng, achê ƀă tơdroăng ai khât ƀă ai hên tơdroăng ki nếo.

Kăn xiâm hnê ngăn tơnêi têa tối nhên klêi 3 hneăng hôp ƀă hnê tối dêi 63 to kong pơlê, pơlê kong kân mơhno tơdroăng mơjiâng ƀă pê klêi tơnêi têa tro tiô luât Việt Nam xah hô̆i chuh ngiah cho kal khât, cho ki xiâm dei pơ’lêh nếo kal kí a tơnêi têa pon ki Hneăng hôp Đảng má 13 hiăng pơkâ.

Gương tơplôu ƀă tơbleăng