VOV4.Xơ Đăng - Kơxê lơ 18/4, a Tíu pêi cheăng Tíu xiâm Đảng hiăng po Rôh hôp má péa dêi Khu hnê mơhno cheăng Tơdroăng tơkêa tung la ngiâ mơjiâng Tơnêi têa hnoăng pơkuâ xua tơdroăng ki pơkuâ po dêi Ngế cheăng tung Khu xiâm pơkuâ tơdroăng kal kí, Kăn xiâm hnê ngăn Tơnêi têa Nguyễn Xuân Phúc, Kăn xiâm pơkuâ Khu hnê mơhno cheăng tơdroăng Tơkêa.

Pôa Nguyễn Xuân Phúc, Kăn xiâm hnê ngăn tơnêi têa pơkuâ po rôh hôp má péa ‘na Tơdroăng tơkêa tung la ngiâ mơjiâng Tơnêi têa pơkuâ

Tơpui a Rôh hôp, teăng mâ Khu hnê mơhno cheăng, pôa Nguyễn Xuân Phúc, kăn xiâm hnê ngăn tơnêi têa ăm ‘nâi, mâu ngế cheăng tung Tôh Rah chêh, mâu khu ki rơkê, khu hriăn ‘na khoa hok hiăng pêi cheăng kơhnâ, rơkê, tối tơbleăng, tơpui tơniăn tơdrăng; tơkŭm mâu tơdroăng ki kal sap ing 27 tơdroăng ki xiâm, 3 kơxop hlá mơ-éa tơpui tơno tơnêi têa; mơdêk ki rơkê, tung tơdroăng ki rah chêh, chêh pro kơxop hlá mơéa, rah chêh vâ ai kơxop hlá mơéa tơdroăng tơkêa rôh má môi, pơtroh ăm rôh hôp dêi Khu hnê mơhno cheăng rôh kố.

Kăn xiâm hnê ngăn tơnêi têa mơnhên tối khât, hiăng ai tơdroăng ki môi tuăn ‘na ki hlê plĕng, tơdroăng ki kal, troăng ngăn hngế ƀă tơdroăng cheăng tung la ngiâ dêi tơdroăng tơkêa ‘’Tơdroăng cheăng tung la ngiâ mơjiâng ƀă pêi klêi Tơnêi têa pơkuâ xah hô̆i chuh ngiah Việt Nam troh hơnăm 2030, troăng pơkâ troh hơnăm 2045’’ tá tơdroăng tơpui leăng, tơdroăng ki ai khât ƀă mâu túa tơmiât hơ’lêh nếo mơnhông krá tơniăn ton dêi tơnêi têa xua tơdroăng pơkuâ dêi Đảng, ai troăng hơlâ luât ƀă tơdroăng kal kí vâ tối nhên mâu tơdroăng ki pơkâ mơ’no tung pơla mơjiâng tơdroăng Tơkêa.

Katarina Nga tơplôu ƀă tơbleăng