VOV4. Xơ Đăng - Pôa Nguyễn Xuân Phúc, Kăn xiâm hnê ngăn tơnêi têa nếo pơtroh kơthô kheăn kơdeăn mâu kuăn pơlê khên tơnôu, tŏng kum mơngế klâk têa a kong pơlê Nghệ An ƀă Hà Tĩnh. Kăn xiâm hnê ngăn tơnêi têa tối rơrêk tung hiâm mơno drêng châ ‘nâi drêng châ hlo ngế klâk têa, pôa Nguyễn Hữu Hiền, Kăn hnê ngăn Khu pơkuâ mô đô̆i hneăng hdrối nah cheăm Thanh Hòa, tơring Thanh Chương, kong pơlê Nghệ An ƀă o Nguyễn Văn Dương, hok tro lâm 8, Hngêi trung râ má péa Minh Lạc, tơring Cẩm Xuyên, kong pơlê Hà Tĩnh, pơrá khên tơnôu, teăm tơdrêng chu tung têa, mơ-eăm tâi ivá tơná tŏng kum mơngế klâk têa, tơkŭm pơlât, hiăng tŏng rêh hên ngế.

Kăn xiâm hnê ngăn tơnêi têa kheăn kơdeăn tơdroăng tŏng kum dêi pôa Hiền ƀă o Dương ƀă tối nhên kố cho mâu ngế ki djâ troăng ahdrối ‘na hiâm mơno khên tơnôu, pêi tơdroăng lĕm, pêng păm khôi túa lĕm tro, tuăn pâ dêi hdroâng mơngế Việt Nam, tơxâng châ kheăn kơdeăn ƀă troh lâp lu tung pơlê pơla.

A Sa Ly tơplôu ƀă tơbleăng