VOV4.Xơ Đăng - Kơxê lơ 21/6, pôa Nguyễn Xuân Phúc, kăn xiâm hnê ngăn tơnêi têa rơtế ƀă Khu kăn Kuô̆k hô̆i Pơlê kong kân Hồ Chí Minh hiăng trâm mâ kuăn pơlê cho ngế cheăng tung Tíu xiâm Măt trâ̆n Tơnêi têa Việt Nam Pơlê kong kân, mâu khu ki rơkê plĕng, mâu ƀok jâ chĭng mâu khu ki loi tĭng tiô khôp, mâu ngế ki châ kuăn pơlê loi nhuô̆m, mâu ngế ki kơhnâ rơkê tung kuăn pơlê mâu hdroâng kuăn ngo, mâu văn ngê̆ sih a Pơlê kong kân Hồ Chí Minh.

Hmâng rơkong tơpui tối dêi kuăn pơlê, pôa Nguyễn Xuân Phúc mơnhên tối mâu tơdroăng ki kuăn pơlê tối hên tơdroăng ki kal dêi Pơlê kong kân Hồ Chí Minh ƀă tơnêi têa, tơkŭm tá tơdroăng loi tĭng, tiô khôp, tơdroăng hnê hriâm, cheăng kâ mơhno túa lĕm tro, kong prâi, hbrâ mơdât kâ kơluâ ƀă hên ki ê.

Mơnhên tối khât mâu rơkong tơpui tối dêi mâu kuăn pơlê, pôa Nguyễn Xuân Phúc tối nhên, tơdroăng ki rơhêng vâ 2045 ăm tơnêi têa pin chiâng tơnêi têa ki mơnhông pêi lo liăn hên gá pơloăng mơnúa kân, pâ thế tơdroăng ki tơdjuôm ivá, tơrŭm, veăng kum sap ing rơxông kuăn pơlê tung pơlê pơla, sap ing mâu khu ki rơkê plĕng, văn ngê̆ sih, khu ki tiô khôp xuân môi tiah tâi tâng rơpŏng mâu hdroâng kuăn Việt Nam. Kăn xiâm hnê ngăn tơnêi têa tối nhên, rêm rôh tơnêi têa trâm pá, veăng kum kế tơmeăm rế ai pơxúa kal khât.

Katarina Nga tơplôu ƀă tơbleăng