VOV4.Xơ Đăng - Kơxê lơ 13/4, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah jâ Amal Abdel Kader Elmorsi, Kăn teăng mâ kong têa Ejipto tơbleăng kơthô râ tơnêi têa. A roh tơdah, Kăn xiâm hnê ngăn tơnêi têa mơnhên  Việt Nam đi đo nhuô̆m tơrŭm tiô khôi vâi krâ nah ƀă kong têa Ejipto ƀă ngăn Ejipto cho khu kơjo má môi dêi Việt Nam a châu Phi. Việt Nam đi đo kheăn kơdeăn  hnoăng cheăng ƀă tíu cheăng ki kal dêi Ejipto a châu Phi ƀă tung lâp plâi tơnêi.

Tối ăm ‘nâi kuăn pơlê Ejipto đi đo kheăn kơdeăn ‘na khôi túa ki má môi xuân môi tiah tơdroăng mơnhông mơdêk dêi Việt Nam, Kăn teăng mâ Ejipto pói vâ péa pâ ai hên troăng thăm tơrŭm tâ mê nếo tung kơvâ kố, ki má lối cho drêng Ejipto xuân ai khôi túa lĕm tro ki má môi tơdâng môi tiah Việt Nam.

A Sa Ly tơplôu ƀă tơbleăng