VOV4.Xơ Đăng -  Tơmiât troh leh tơbâ 75 hơnăm Hâi mô đô̆i rong râ, hlâ hía, kơxê lơ 13/7, a Tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa trâm mâ mâu kăn teăng mâ Khu ki rak tơpui Khu mô đô̆i hneăng hdrối nah lâp tơnêi têa tíu tơplâ xâ Vị Xuyên – Hà Tuyên. Xông tơpui a roh trâm mâ, Kăn xiâm hnê ngăn tơnêi têa mơnhên, Tơnêi têa, kuăn pơlê đi đo nhuô̆m, pâ vế, troh tá ah pâ mơnê mâu ngoh khên tơnôu, mô đô̆i hlâ tung tơplâ xâ ƀă mâu lêng hiăng veăng tơplâ gâk kring Tơnêi têa; kum thăm tơ’nôm tơdroăng pâ nhuô̆m tơnêi têa, mâu ngoh khên tơnôu dêi kuăn pơlê pin.

Pôa Nguyễn Xuân Phúc, Kăn xiâm hnê ngăn tơnêi têa tơdah kăn teăng mâ mô đô̆i hneăng hdrối nah tíu tơplâ xâ a Vị Xuyên – Hà Tuyên

Kăn xiâm hnê ngăn tơnêi têa kheăn kơdeăn mâu tơdroăng mơ-eăm veăng tŏng kum, tơkâ hluâ pá puât dêi Khu ƀă Khu ki rak tơpui Mô đô̆i hneăng hdrối nah lâp tơnêi têa a tíu tơplâ xâ Vị Xuyên hluâ 6 hơnăm mơjiâng. Ƀă dâng 22 rơpâu ngế veăng tung 44 chi hô̆i a kong pơlê, tíu pêi cheăng, Khu mô đô̆i hneăng hdrối nah đi đo thăm krá tơniăn ‘na khu pêi cheăng ƀă tơdroăng cheăng pêi rế hên, tơxâng tiô tơdroăng pêi cheăng, tŏng kum ‘na troăng hơlâ mơhá hnoăng liăn; hnê ăm dêi pó, kum dêi pó, mơhnhôk dêi pó tung tơdroăng rêh ối.

A Sa Ly tơplôu ƀă tơbleăng