VOV4.Xơ Đăng - Kơxê kố, lơ 27/5, pôa Nguyễn Xuân Phúc, Kăn xiâm hnê ngăn tơnêi têa hiăng tơdah Khu mơngế Hàn Quốc a Việt Nam xua jâ Chang Eun-sook, Kăn hnê ngăn Khu pơkuâ djâ. Pôa Nguyễn Xuân Phúc tối nhên ‘na tơrŭm cheăng lĕm tro klêi kơ’nâi 30 hơnăm Việt Nam – Hàn Quốc mơjiâng tơrŭm tơpui kâ ƀă kong têa ê ƀă nôkố dế cho khu tơrŭm cheăng ton xŏn. Hàn Quốc cho kong têa ai kơxô̆ liăn mơ’no cheăng hên má môi a Việt Nam, châ 80 rơtal dollars Mih ƀă lối 9 rơpâu tơdroăng tơkêa bro.

Nôkố ai lối 200 rơpâu ngế Hàn Quốc dế rêh ối, pêi cheăng a Việt Nam. Ƀă a kong têa Hàn Quốc mê xuân ai dâng 200 rơpâu ngế Việt Nam hriâm tâp, pêi cheăng, rêh ối. Ƀă xiâm kối mê, Kăn xiâm hnê ngăn tơnêi têa pin pói vâ Khu mơngế Hàn Quốc a Việt Nam ai hên troăng thăm tơrŭm cheăng péa tơnêi têa tung hên kơvâ cheăng.

A Sa Ly tơplôu ƀă tơbleăng