VOV4.Xơ Đăng - Xuân tung kơxê lơ 8/6, a tíu pêi cheăng Kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa tơdah pôa Rajnath Singh, Ngế xiâm pơkuâ lêng kong têa Ấn Độ dế lăm pôu pêi cheăng Việt Nam. A roh tơdah, pôa Nguyễn Xuân Phúc phiu ro hlo tơrŭm cheăng lêng pơla péa pâ pơtối mơnhông mơdêk châ tơƀrê, tơrŭm păng ‘nâng, châ tơƀrê, kum kal khât tung tơrŭm cheăng pơla péa pâ.

Pôa Nguyễn Xuân Phúc, kăn xiâm hnê ngăn tơnêi têa tơdah Ngế xiâm pơkuâ lêng kong têa Ấn Độ

Môi tuăn ƀă rơkong tơpui dêi pôa Rajnath Singh tối, pôa Nguyễn Xuân Phúc tối nhên, tơrŭm cheăng lêng châ ngăn cho môi tơdroăng ki kal tơrŭm cheăng pơla Việt Nam - Ấn Độ. Tung pơla tơdroăng lâp plâi tơnêi, kơpong ai tơdroăng ôh tá tơniăn nôkố, Kăn xiâm hnê ngăn tơnêi têa kheăn kơdeăn Khu xiâm pơkuâ lêng péa tơnêi têa pơtối thăm mơjiâng krá tơniăn hiâm mơno loi tơngah kal kí, pêi pro tŭm, châ tơƀrê, păng ‘nâng mâu mơ-éa tơrŭm cheăng hiăng kĭ, phiu ro péa Khu xiâm pơkuâ lêng péa tơnêi kĭ tơkêa tơbleăng troăng tơmiât tơdjuôm ‘na tơrŭm cheăng lêng Việt Nam - Ấn Độ troh hơnăm 2030.

A Sa Ly tơplôu ƀă tơbleăng