VOV4.Xơ Đăng - Pơtối rôh hôp má 3, Kuô̆k hô̆i hneăng 15, hâi lơ 25/5, tơpui tơno a tôh ‘na tơdroăng cheăng kâ - rêh ối ƀă liăn ngân tơnêi têa mâu khế apoăng hơnăm 2022, mâu kăn tối mâu tơdroăng ki mơ-eăm dêi Chin phuh vâ pơtối ‘mâi mơnhông cheăng kâ ôh tá tơniăn tung pơla hdrối nah. Ki hên mâu kăn vâ môi tuăn ƀă hlá mơ-éa tối tơbleăng dêi Chin phuh pơtroh ăm Kuô̆k hô̆i, tơdroăng mê cho tơkŭm dêi mâu tơdroăng mơ-eăm pêi kơtăng, ôh tá tơbriât tung pơla hdrối kố nah. GDP pái khế apoăng hơnăm tâng riân tâk 5,03%, Tơdroăng cheăng kâ kân tơniăn, mâu kơvâ cheăng dế vêh tâk nếo.

Laga, mâu kăn tối tô tuăn drêng yă têa châu to kơnâ tơdjâk ó troăng yă tê mâu tơmeăm pêi lo, tơmeăm mơjiâng hngêi trăng, tơdjâk troh liăn chơ tơmeăm. Tâng ôh tá séa ngăn mơdât yă têa châu to mê tâi tâng tơmeăm chiâng to kơnâ yă pro chiâng mâu tơmeăm ki ê tâk há.

A rôh hôp tơpui tơno, pôa Nguyễn Xuân Phúc, Kăn xiâm hnê ngăn tơnêi têa tối nhên ing kăn ƀô̆ mâu kăn lơ khu kăn Kuô̆k hô̆i pôi tá tơngôu tơdroăng mê, pôi tá ngăn hlo ti mê hôm ƀă hnoăng pêi pro apoăng, xúa ‘na ngiâ ối hên tơdroăng ki xơpá. Thế tơtrŏng kơxô̆ liăn ki mơhnhôk cheăng kâ, ‘no mơjiâng tơmeăm khoăng tơnêi têa châ mơdêk tro tâ nếo, hlối châ xúa tung rêh ối teăm kơjo kum kuăn pơlê, khu mơdró môi tiah troăng rơhlâ dêi Đảng, Tơnêi têa. pôa Nguyễn Xuân Phúc tối tơdroăng ki hlá tơbeăng chêh tiah kố “Pôi tá pro yă liăn ôh tá kơnâ ah lơ tơdjâk troh mâu kơtiê”.

Gương tơplôu ƀă tơbleăng