VOV4.Xơ Đăng - Drêng tơbâ 40 hơnăm Hâi mơjiâng ƀă hbrâ po Hneăng hôp kân 9 hneăng hơnăm 2022 – 2027 dêi Khu xiâm mơjiâng tơmeăm Việt Nam, kơxê lơ 5/7, a Tíu pêi cheăng kăn xiâm hnê ngăn tơnêi têa, pôa Nguyễn Xuân Phúc, Kăn xiâm hnê ngăn tơnêi têa trâm mâ khu kăn teăng mâ ăm lối 7 rơpâu ngế tung khu, khu pú hên, mâu ngế krê dêi Khu xiâm mơjiâng tơmeăm Việt Nam. Tơpui a rôh trâm mâ, teăng mâ kăn pơkuâ Đảng, Tơnêi têa, kăn xiâm hnê ngăn tơnêi têa khê̆n ivá mơ-eăm, veăng kum dêi Khu xiâm ngăn ‘na mơjiâng tơmeăm Việt Nam tung 40 hơnăm hdrối nah ƀă hnoăng cheăng mơjiâng ƀă mơnhông tơnêi têa.

Pôa Nguyễn Xuân Phúc, Kăn xiâm hnê ngăn tơnêi têa trâm mâ khu kăn Khu xiâm mơjiâng Việt Nam

Kăn xiâm hnê ngăn tơnêi têa pơkâ thế Khu xiâm mơjiâng hô̆i mơdêk khôi hmâ 40 hơnăm, mơhnhôk mâu khu ki hriăn ‘na khoa hok ƀă khu ki rơkê tung tơnêi têa ƀă tơ’mot hên hĭn mâu khu ki rơkê dêi Việt Nam a kong têa ê vâ mơdêk ki rơkê tung pêi cheăng. Tơdrêng amê hlối mơdêk ki rơkê tung tiâ mơnhên, séa ngăn ƀă tơpui leăng tung kơvâ mơjiâng; tí tăng ‘nâi plĕng ăm Đảng ƀă Tơnêi têa mâu tơdroăng tung la ngiâ mơnhông tơdjâk môi tiah hngêi ối, kơphô̆, kơpong cheăng ƀă kơmăi kơmok, mâu hngêi trăng troăng klông cheăng kâ rêh ối pơlê pơla, mau tơdroăng ki kal ki ê, túa pơkâ rak tơniăn ‘na tơdroăng khôi túa lĕm tro Việt.

Katarina Nga tơplôu ƀă tơbleăng