VOV4.Xơ Đăng - Hâi hnah, lơ 11/5, a pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa rơtế Khu râ kăn teăng mâ Kuô̆k hô̆i pơlê kong kân Hồ Chí Minh trâm mâ kuăn pơlê pơlê kong kân  a mâu tơring Củ Chi, Hóc Môn, pơlê kong kơdrâm Thủ Đức tiô troăng tơdrêng ƀă mơ’no tơdrêng tung um tiô hyôh măng. Xông tơpui a hneăng hôp, pôa Nguyễn Xuân Phúc kheăn kơdeăn kuăn pơlê kong kân Hồ Chí Minh tối hên tơdroăng ki má môi ƀă tơdroăng mơnhông mơdêk dêi pơlê kong kân ƀă lâp tơnêi têa.

Pôa Nguyễn Xuân Phúc, Kăn xiâm hnê ngăn tơnêi têa trâm mâ kuăn pơlê a pơlê kong kân Hồ Chí Minh

A hneăng hôp, pôa Nguyễn Xuân Phúc, Kăn xiâm hnê ngăn tơnêi têa pơkâ mâu tơring, pơlê kong kơdrâm ƀă pơlê kong kân Hồ Chí Minh tiâ tối mâu tơdroăng ki kuăn pơlê tơpui tối, tơdrêng amê ai tơdroăng pêi cheăng pơtối vâ tiâ rơkong kuăn pơlê inhên mâu tơdroăng ối tơvâ tơvân. Mâu kuăn pơlê kheăn kơdeăn mâu kăn teăng mâ Kuô̆k hô̆i pơlê kong kân Hồ Chí Minh hiăng ai hên tơdroăng pêi cheăng ki nhên, tơmâng rơkong tơpui tối dêi kuăn pơlê kong kân vâ hbrâ mâu tơdroăng xiâm hdrối hneăng hôp má 3 dêi Kuô̆k hô̆i hneăng má XV. Ƀă mâu tơdroăng kân dêi tơnêi têa, mâu kuăn pơlê tối tơmâng troh tơdroăng châ tơƀrê Hneăng hôp Tơnêi têa 5 hneăng má XIII, tung mê ai tơdroăng tơnêi tơníu, pơtối thăm hbrâ, mơdât kâ kơhveăm liăn ngân ôh tá ai kơpong mơdât.

A Sa Ly tơplôu ƀă tơbleăng