VOV4.Xơ Đăng - Hâi lơ 12/4, pôa Nguyễn Xuân Phúc, kăn xiâm hnê ngăn tơnêi têa veăng hô a Rôh hôp pơka mơdêk ‘no liăn a péa tơring Hóc Môn prếi Củ Chi, pơlê kong kân Hồ Chí Minh. Kố cho rôh hôp mơdêk ‘no liăn kân má môi tơnêi têa ƀă tơdroăng ki veăng dêi 550 ngế kăn, ki hên cho khu mơdró kâ. A rôh hôp, péa tơring Củ Chi prếo Hóc Môn hiăng tơbleăng mâu tơdroăng ki hiăng ai hlâu mơnhông, mâu tơdroăng ki pơxúa krê ai ƀă krếo thế ‘no liăn tung 55 tơdroăng tơkêa ƀă tâi tâng kơxô̆ liăn lối 285 rơpâu rơtal liăn tung mâu kơvâ hngêi trăng troăng klông, ‘mâi rơnêu kơphô̆, tíu pêi cheăng, pêi chiâk deăng, tê mơdró.

Hên khu ‘no liăn châ diâp hlá mơéa mơnhên ‘no liăn a Rôh hôp

Tơpui a rôh po hôp, phiu ro mâu khu mơdró kâ tơhrâ ‘no liăn a Củ Chi prếi Hóc Môn, pôa Nguyễn Xuân Phúc tối nhên, kố cho mâu tơring ki ai hên ivá mơnhông, kơpong ki xiâm tơdjêp ƀă Long An, Bình Dương, ai ivá tơdjêp troăng têa ƀă lo troh a kroăng Sài Gòn. Pôa Nguyễn Xuân Phúc pơkâ thế mâu khu ‘no liăn cheăng tối athế tơtro ƀă pêi, rĕng tơbleăng tơdroăng tơkêa ƀă tối ôh ƀă tơdroăng ki kâ kơluâ. Rơtế ƀă mê cho tơhrâ tung rak vế kong prâi, pôu râng hnoăng ƀă pơlê pơla, veăng kum rak vế ƀă mơdêk ki kơnía mơhno túa lĕm tro.

Katarina Nga tơplôu ƀă tơbleăng