VOV4.Xơ Đăng - Kơxo lơ 19/5, a tíu pêi cheăng dêi khu xiâm pơkuâ ngăn lêng tơkăng kong, pôa Nguyễn Xuân Phúc, kăn xiâm hnê ngăn tơnêi têa veăng leh diâp pri Hồ Chí Minh ‘na khoa hok, kŏng ngê̆ cheăng lêng, ‘na lêng kring gak tơkăng kong. Teăng mâ kăn xiâm Đảng tơnêi têa, pôa Nguyễn Xuân Phúc, kăn xiâm hnê ngăn tơnêi têa diâp hlá mơ-éa mơnhên mơhá pri ăm mâu khu cheăng khoa hok mâu ki chêh pro mâu tơmeăm khoa hok hâk tơngăm châ kâ pri mơhá.

Pôa Nguyễn Xuân Phúc, Kăn xiâm hnê ngăn tơnêi têa veăng leh diâp pri Hồ Chí Minh ‘na lêng, ‘na lêng kring gak tơkăng kong

Pôa Nguyễn Xuân Phúc, Kăn xiâm hnê ngăn tơnêi tối nhên, péa tơmeăm khoăng lêng, lêng gak tơkăng kong dêi 49 ngế chêh pro châ mơhá pri Hồ Chí Minh drêng kố ai pơxúa kân, cho tơdroăng pêi bro ton hơnăm hnoăng tí tăng 'nâi plĕng, pleăng tuăn ngôa rơkê ƀă ki rơkê dêi mâu khu cheăng khoa hok lêng. Péa tơmeăm khoăng lêng, ‘na lêng tơkăng kong dêi Grup ngăn ‘na kơmăi kơmok- Hyôh phôn lêng châ pêi pro xua ing pú hên dêi mâu kăn ƀô̆ khoa hok dêi Grup ƀă veăng ai hên kăn ƀô̆ hơnăm ối nếo, châ hriâm trâu rơkê rơtế ƀă tơdroăng veăng tơmâng dêi mâu kăn pơkuâ, hnê mơhno nhên khât, ki tơ-ƀrê ing khu đảng lêng xiâm, khu xiâm pơkuâ ngăn lêng, veăng kơjo kum ing mâu kơ koan, tíu cheăng tung khu lêng.

Gương tơplôu ƀă tơbleăng