VOV4.Xơ Đăng - Kơmăng lơ 30/1, a tơring Ba Tri, kong pơlê Bến Tre hiăng tơkŭm po Leh tơbâ 200 hơnăm Hâi kot mâ pôa Nguyễn Đình Chiểu, Ngế ki ô eăng; 30 hơnăm Hâi mơjiâng khôi túa lĕm tro kong pơlê Bến Tre. Troh veăng ƀă xông tơpui a roh leh, pôa Nguyễn Xuân Phúc, Kăn xiâm hnê ngăn tơnêi têa tối nhên, pôa Nguyễn Đình Chiểu hiăng tơkâ hluâ pơloăng mơnúa, pá puât dêi tơdroăng rêh ối, chiâng môi ngế thái pơkeăng rơkê, môi thái yăo tá hiêm mơno, môi ngế pro thơ prôk hdrối tung tơdroăng hbrâ mơdât thưk yân.

Pôa Nguyễn Xuân Phúc, Kăn xiâm hnê ngăn tơnêi têa xông tơpui a roh leh

Kăn xiâm hnê ngăn tơnêi têa phiu ro hlo tơdroăng ki pơhlêh, mơnhông mơdêk hluâ pơkâ ‘na cheăng kâ – rêh ối pơlê pơla, ki má lối tung pơla achê kố Đảng ƀô̆ Bến Tre ai hên tơdroăng mơ-eăm tơkâ hluâ pá puât, mơhnhôk hên khu râ ăm mơ’no liăn cheăng mơnhông mơdêk, hên tơmeăm, tơdroăng tơkêa bro dế châ mơ’no liăn mơjiâng pro môi tiah kông Rạch Miễu 2, mâu tơmeăm on tơhrik kơtâu ƀă khía ƀă hía hé; hên tơdroăng rơtế pơxiâm nếo ‘na cheăng kâ dế pêi pro a pơlê xiâm Đồ Chiểu, kum tung mâu tơdroăng châ tơƀrê tơdjuôm dêi lâp tơnêi têa.

            A Sa Ly tơplôu ƀă tơbleăng