VOV4.Xơ Đăng - Hâi lơ 16/5, a Tíu pêi cheăng Chin phuh, pôa Phạm Bình Minh, Ngế pro xiâm phŏ hnê ngăn tơnêi têa, Tôh trưởng Tôh pêi cheăng kơxô̆ 1 ‘na séa ngăn, hnê pơchân, pơkâ tơleăng xơpá, mơdêk tơdroăng ki ‘no liăn cheăng tơdjuôm hơnăm 2022 pơkuâ po rôh hôp ƀă 9 khu xiâm, kơvâ cheăng, kơ koan ai tơdroăng ki xoăng liăn hrá tâ tâng vâ pơchông ƀă tơdroăng pơkâ tơdjuôm tung lâp tơnêi têa.

A rôh hôp, teăng mâ 9 khu xiâm, kơvâ cheăng, kơ koan hiăng tối mâu tơdroăng ki xơpá, tơvâ tơvân ki ai tơdjâk troh hnoăng cheăng gu tơnêi pro tơbăng, tung pơla ai mâu tơdroăng tơkêa nếo kal hâi khế pêi klêi mâu hlá mơ-éa ‘no liăn cheăng tiô pơkâ. Mâu tơdroăng pơkâ châ tơbleăng a hên kong pơlê, ivá cheăng dêi mâu khu râ, kơvâ cheăng rak ngăn tơdroăng tơkêa, ngế ki ‘no liăn cheăng, ngế ki xo pêi tơdroăng tơkêa ối ôh tá tơniăn.

Mâu kơ koan hiăng pâ thế pơtroh ăm Ngế pro xiâm hnê ngăn Chin phuh ăm phêp pro mơdon túa pơkâ ‘no liăn cheăng cho liăn Tơnêi têa hơnăm 2021 chiâng troh hơnăm 2022; tơdrêng amê hlối pơkâ thế Khu xiâm mơjiâng pro kế tơmeăm khoăng séa ngăn, pơtroh ăm Chin phuh ai túa pơkâ ƀă troăng hơlâ tŏng kum pơkâ tơleăng xơpá ăm mâu khu ki xo pêi tơdroăng tơkêa tro tơdjâk xua yă kế tơmeăm mơjiâng pro to kơnâ.

Katarina Nga tơplôu ƀă tơbleăng