VOV4.Xơ Đăng - Klăng tĭng kân Phât đản Phât lĭch 2566, yương lĭch 2022, hâi lơ 11/5 , pôa Phạm Bình Minh, Kăn cheăng tung Khu xiâm kal kí, Ngế pro xiâm phŏ hnê ngăn tơnêi têa hnê mơhno má môi hiăng troh lăm pôu, rơkâu Khu xiâm pơkuâ khôp Phop Việt Nam ƀă ƀok phop, kuăn khôp phop tơdah môi rơnó Phât đản tơniăn lĕm, pôa Phạm Bình Minh tối rơdêi, Tĭng kân Phât đản  cho roh mâu ƀok phop, kuăn khôp phop xuân môi tiah kuăn pơlê lâp tơnêi têa tơmiêt troh Phop thích ca mâu ni, xuân môi tiah troăng tiô khôp dêi hdroâng mơngế, mê cho: ‘’Ai hiêm mơno lĕm, ôh tá ‘nhó dêi pó, tơdrăng, rêh ối lĕm,  rêh lĕm ƀă dêi pó’’. Tối rơdêi, hơnăm 2022 cho hơnăm ki kal ƀă Khôp Phop Việt Nam ƀă tơdroăng tơkŭm po Hneăng hôp ‘na phop Việt Nam roh má 9, Ngế pro xiâm phŏ hnê ngăn tơnêi têa loi tơngah Khu pơkuâ Khôp Phop Việt Nam kô tơkŭm po châ tơƀrê Hneăng hôp ƀă troăng ‘’Tiô tơdroăng khôp – Hdroâng mơngế - Chưh nghiah pơlê pơla’’.

A Sa Ly tơplôu ƀă tơbleăng