A rôh tơdah, Ngế pro xiâm hnê ngăn tơnêi têa prế kăn xiâm phŏ hnê ngăn Vi ƀan châu Âu, phiu ro drêng hlo hdrối kố nah, tơrŭm cheăng tê mơdró – ‘no liăn cheăng Việt nam – EU ‘mâi mơnhông ƀă mơdêk tơniăn ôh tá vâ hmâng mâu tơdroăng ki xơpá xua COVID-19 ƀă tơdroăng ki tro pơtê ‘na tê kế tơmeăm.

EU nôkố cho kong têa tơrŭm tê mơdró kân má 4 (klêi Sinuâ, Mih, Hàn Quốc), kong têa ki tê tơmeăm ngi kong têa ê kân má 3 kong têa ki roê ‘mot kế tơmeăm kân má 5 dêi Việt Nam. Ƀă Việt Nam cho kong têa tê mơdró kân má môi dêi EU a ASEAN. Ngế pro xiâm hnê ngăn Chin phuh tối nhên, Việt Nam đi đo ngăn EU cho môi tung mâu kong têa ki tơngah, tơrŭm cheăng kâ má môi tung inâi tơpui kâ dêi tơná.

Vâ tơbleăng tơƀrê tơrŭm cheăng Việt Nam – EU, Ngế pro xiâm hnê ngăn tơnêi têa pơkâ thế péa pâ thăm mơdêk pơtroh mâu khu râ kăn troh a tơnêi têa dêi rơpó; mơdêk rơdêi tung mâu kơvâ cheăng hơ’lêh ngiât, hơ’lêh kơxô̆, cheăng kâ tâ tá, cheăng kâ tối tơbleăng dêi rơpó, mơjiâng ƀă pêi klêi mâu troăng hơlâ pơkâ, hnê ăm mâu ngế cheăng ƀă hên tơdroăng ki ê.