Péa ngế kăn tối tung la ngiâ, mơ-eăm pơtối tơbleăng tơrŭm cheăng tung tŭm tơdroăng pơla Việt Nam - Hàn Quốc mơnhông rơdêi, trâu rơdâ tâ nếo. Péa pâ vâ môi tuăn mơnhông tơrŭm tơpui kâ trâm mâ mâu kăn; mơdêk tơrŭm ‘na cheăng lêng, kring tơniăn; mơdêk tơrŭm cheăng kâ, tê mơdró, tah xơpá, pro hlâu ăm tơmeăm châ tê a tơnêi têa dêi rơpó, xuân môi tiah tơrŭm cheăng kơvâ ki nếo, hên tơmeăm khoăng môi tiah khoa hok kŏng ngê̆, pơ’lêh nếo, tăng ‘nâi plĕng ƀă mơnhông.

Pôa Phạm Minh Chính, Ngế pro xiâm hnê ngăn Chin phuh tối Việt Nam kô pơtối pro hlâu ăm mâu khu ‘no liăn cheăng dêi Hàn Quốc pêi cheăng ton hơnăm a Việt Nam; pơkâ thế Hàn Quốc pơtối po troăng tê mơdró rôe tơmeăm Việt Nam, malối tơmeăm pêi lo ing chiâk deăng, rôe tơmeăm ing kong têa Hàn Quốc,  gum ăm Việt Nam mung liăn vâ tơbleăng pêi mâu tơdroăng tơkêa bro ki kan, mê cho troăng rơxế lơ treng, troăng prôk tơdrăng lĕm.