Pơla hdrối kố nah, pôa Phạm Minh Chính, Ngế pro xiâm hnê ngăn Chin phuh hiăng veăng hôp a rôh hôp ‘no tơdrêng ing troăng hyôh internet mơgêi hơnăm hriâm 2022 – 2023 ƀă hbrâ ăm hơnăm hriam nếo 2023 – 2024.

‘Na túa pơkâ, hnoăng cheăng ki xiâm tung hơnăm hriâm nếo 2023 – 2024, Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kơ koan, kong pơlê pơtối séa ngăn, ‘mâi rơnêu, ‘mot tơ’nôm teăm tơdrêng tiô troăng hơlâ, tŏng kum, pêi klêi tơdroăng luât ki tơ’lêi hlâu vâ pêi pro hơ’lêh nếo hnê hriâm ƀă hnê mơjiâng tuăn ngôa rơkê, Túa pơkâ mâu kế tơmeăm xúa tung hnê hriâm đăi hok ƀă sư phạm pơla hơnăm 2021- 2030, troăng ngăn troh hơnăm 2050 ƀă rĕng tơbleăng túa pơkâ tơ’noăng râ má pái phôh thong tiô Tơdroăng hnê hriâm phôh thong 2018.

Malối Ngế pro xiâm hnê ngăn tơnêi têa pơkâ thế, tơkŭm po tơniăn tro mơgêi 10 hơnăm pêi pro Pơkâ 29 dêi Tơnêi têa ‘na hơ’lêh nếo, tâi tâng tơdroăng ki hnê hriâm ƀă hnê mơjiâng tuăn ngoâ; Pơtối hriăn ngăn, pêi klei, mơnhông Tơdroăng hnê hriâm phôh thong 2018 tơtro ƀă pơkâ mơ’no. Pakĭng mê, Ngế pro xiâm hnê ngăn tơnêi têa pơcháu mâu khu xiâm kơvâ cheăng, kong pơlê tơrŭm ƀă Khu xiâm ngăn hnê hriâm ƀă hnê mơjiâng tuăn ngoâ rơkê ai troăng hơlâ tŏng kum liăn ngân ăm thái cô kơpong hngế hngo; pơtối ‘no liăn bro troăng klông malối ‘na troăng mơ’no hyôh internet a mâu kơpong hdroâng kuăn ngo, peăng kong ngo, chuăn rơlố.

Pôa Phạm Minh Chính, Ngế pro xiâm hnê ngăn Chin phuh xuân pơkâ thế rêm ngế muăn hok tro, sinh viên kal mơ-eăm hriâm tâp ƀă hriâm pât; hbrâ kơchăng, hbrâ rơnáu ƀă tơmiât rơkê hên tâ tung mâu tơdroăng ki hnê hriâm ƀă hriâm tâp.

“Hơnăm hriâm nếo 2023 – 2024, Ngế pro xiâm hnê ngăn tơnêi têa rơkâu kăn ƀô̆ pơkuâ ngăn, mâu thái cô đi đo mơdêk hiâm mơno pâ nhuô̆m tơnêi têa, hiâm mơno pôu râng ƀă kơhnâ hâk ƀă hnoăng cheăng, ‘mâi mơnhông mâu tơdroăng xơpá, mơ-eăm hơ’lêh nếo mâu hlá mơ-éa, hơ’lêh tâi tâng tung tơdroăng hnê hriâm ƀă hnê mơjiâng, pei pro tiô tơdroăng ki tơkôm dêi Đảng, Tơnêi têa ƀă Kuăn pơlê, veăng kum tơxâng tung tơdroăng mơnhông khên rơdêi, kro mơdrŏng dêi tơnêi têa”.