Pôa Phạm Minh Chính, Ngế pro xiâm hnê ngăn Chin phuh tối Đảng, Tơnêi têa ƀă Kuăn pơlê Việt Nam ngăn nhoăm ƀă hâk mơnê tơdroăng tơrŭm cheăng ki kân, môi tuăn má lôi tơrŭm tung tŭm tơdroăng pơla Việt Nam - Lếo, ngăn mê cho tơmeăm kơnía git, pơkâ thế tro, pêi ahdrối, rah xo mâu tơdroăng ki kal ƀă tơdroăng cheăng kăch măng dêi péa tơnêi têa, kal rak ăm mâu rơxông kơ’nâi.

Péa ngế kăn vâ môi tuăn tung la ngiâ, péa pâ kal tơkŭm pêi tơƀrê mâu tơdroăng tơhrâ, tơrŭm cheăng péa tơnêi têa, malối cho tơdroăng ki tơƀrê rôh trâm mâ pơla péa Ngế xiâm kal kí Việt Nam ƀă Lếo a chê kố a Hà Nội; mơdêk tâ nếo tơrŭm ƀă dêi rơpó ‘na cheăng kâ pơla Việt Nam Lếo ƀă pái tơnêi têa cheăng kâ Việt Nam - Lếo - Kul; pơtối po hôp đi đo tơpui tơdroăng cheăng, tối ăm dêi rơpó ‘nâi tơdroăng nếo ai, tơrŭm krá ƀă veăng môi tuăn dêi rơpó kum dêi rơpó a mâu hneăng hôp kân lâp plâi tơnêi ƀă tung kơpong.