VOV4.Xơ Đăng - Tiô rơkong krếo thế dêi pôa Joe Biden, Kăn xiâm pơkuâ kong têa Mih, sap hâi lơ 11 – 17/5, pôa Phạm Minh Chính, Ngế pro xiâm hnê ngăn Chin phuh Việt Nam kô pơkuâ djâ khu râ kăn teăng mâ Việt Nam veăng Hneăng hôp khu râ kăn xiâm ASEAN – Mih, lăm pôu ƀă pêi cheăng a Mih ƀă Khu lâp kong têa. Kố cho roh lăm pôu pêi cheăng kong têa ê apoăng dêi pôa Phạm Minh Chính tung pơla Việt Nam hiăng kâi mơdât pơreăng COVID-19 tung lâp tơnêi têa, loi tơngah vêh lôu péa, pêi pro tơdroăng pro tơniăn rĕng ƀă mơnhông krá tơniăn cheăng kâ – rêh ối pơlê pơla, thăm mot tơrŭm cheăng lâp plâi tơnêi tŭm têk, trâu hơngế, păng ‘nâng, châ tơƀrê.

Roh lăm pôu pêi cheăng dêi pôa Phạm Minh Chính troh a kong têa Mih roh kố châ pói tơngah ƀă cho roh tơ’lêi vâ mơnhông mơdêk tâ mê nếo tơrŭm cheăng lĕm tro tung tơrŭm cheăng kâ pơla péa tơnêi têa.