Klêi tơmâng mâu tơdroăng veăng hnê a rôh tơbleăng, tối mơgêi hâi pêi cheăng, pôa Phạm Minh Chính, Ngế pro xiâm hnê ngăn Chin phuh khĕn kơdeăn ki kơdôu mơ-eăm khĕn kơdeăn khât tơdroăng ki Đảng ƀô̆, mâu kăn ƀă kuăn pơlê Trà Vinh hiăng pê klêi tung tơdroăng mơnhông cheăng kâ rêh ối tung hơnăm hdrối mê hía nah, hiăng veăng ‘no hnoăng mơnhông tơdjuôm dêi lâp tơnêi têa.

‘Na troăng rơhlâ mơnhông, Ngế pro xiâm hnê ngăn tơnêi têa tối nhên, Kong pơlê kal pêi tơƀrê tơdroăng ki kal vâ mơnhông tơƀrê, krá ton, Trà Vinh  ngăn a mâu tơdroăng ki xiâm. Pêi chiâk deăng xúa kơmăi kơmok ki dâi lĕm ƀă tuăn rơkê tung pêi klâng chiâk; Cheăng kâ a têa kơxĭ pro xiâm; Kơmăi kơmok tơkŭm a têng pro, uâ pơliê tơmeăm pê lo ung chiâk deăng, pro on tơhrik; mơnhông cheăng kâ hlâ rơ’lêi, pơ’lêh kơxô̆, hriĕn plĕng ki nếo, xiâm mơngế pêi cheăng krá rơdêi; mơjiâng tơmeăm khoăng tro kih thuât, tơmeăm khoăng pơlê pơla, kơphô̆ ‘no liăn mơjiâng tơdâng tơ’mô, tiô túa nếo.