Klêi kơ’nâi tơmâng mâu rơkong tơpui tối, mơgêi hneăng hôp, pôa Phạm Minh Chính mơnhên, ƀlêi trâng mơdât pơreăng COVID-19 cho ƀlêi trâng dêi kuăn pơlê, ing pơkuâ teăm tơdrêng dêi Đảng Kŏng san Việt Nam, Khu pơkuâ tơnêi têa, Khu xiâm kal kí, tơdrêng amê cho pôa Nguyễn Phú Trọng, Kăn xiâm pơkuâ hnê ngăn Đảng.

‘Na troăng la ngiâ, hnoăng cheăng la ngiâ Ngế pro xiâm hnê ngăn tơnêi têa pơkâ, pơtối pêi kêi đeăng tiô pơkâ, troăng hơlâ; tah lôi mâu tơdroăng pá puât ối ai tung tơdroăng hbrâ, mơdât pơreăng tung mê tơkŭm tah lôi mâu tơdroăng pá puât, tơvâ tơvân tung luât nôkố ƀă mơjiâng luât tơdâng tơ’mô, tŭm, tơtro, tơxâng teăm tơdrêng hbrâ, mơdât pơreăng ki má lối cho ‘na rôe pơkeăng, vaccine, tơmeăm khăm pơlât, pơkeăng pơlât vâ pơlât teăm tơdrêng, tá drêng thâ kal.