VOV4.Xơ Đăng - Kơxê lơ 14/7, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ Hneăng hôp mơnhông tơdroăng tê mơdró hngêi trăng, tơnêi tơníu tơniăn, lĕm, krá tơniăn. Hneăng hôp châ tơkŭm po tiô troăng mơ’no tơdrêng tung um tiô troăng hyôh măng pơla Tíu pêi cheăng Chin phuh ƀă Vi ƀan kuăn pơlê 5 pơlê kong kân ối tung tơnêi têa mê cho Hà Nội, Pơlê kong kân Hồ Chí Minh, Đà Nẵng, Hải Phòng, Cần Thơ.

Pôa Phạm Minh Chính, Ngế pro xiâm hnê ngăn tơnêi têa xông tơpui a hneăng hôp

A hneăng hôp, mâu kăn tơkŭm tơpui tơno mơnhên ƀă tối hdrối tơdroăng tê mơdró hngêi trăng, tơnêi tơníu Việt Nam, pơkâ mơnhên troăng prôk la ngiâ, troăng pêi ‘na hngêi trăng, tơnêi tơníu ƀă mâu hngêi trăng, tơnêi tơníu ki hiăng ai vâ tơdroăng tê mơdró mơnhông mơdêk tơniăn, lĕm, krá tơniăn. Xông tơpui a hneăng hôp, pôa Phạm Minh Chính pơkâ thế mâu khu xiâm, kơvâ cheăng, pơlê kong kân ‘nâi nhên tơdroăng mơdêk tơdroăng tê mơdró hngêi trăng, tơnêi tơníu, tơdâng tơdroăng tê ƀă kal vâ, mơjiâng tíu tê rôe tơdâng, tung mê kơjo tê mâu tơnêi tơníu ăm mơjiâng hngêi trăng ăm kuăn pơlê rêh ối cheăng kâ; nhuô̆m tiô luât kơchơ tê mơdró laga thế ai hnoăng pơkuâ dêi Tơnêi têa, ôh tá ăm ai tơdroăng ôh tá lĕm tro, pêi pro tiô dêi troăng tơná tơmiât.

A Sa Ly tơplôu ƀă tơbleăng