VOV4.Xơ Đăng - Kơxo lơ 29/4, a tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa pơkuâ roh hôp Chin phuh tiah hmâ khế 4. Xông tơpui a roh hôp, pôa Phạm Minh Chính tối nhên, tơdroăng cheăng kâ – rêh ối pơlê pơla ngăn tơdjuôm ai troăng rak tơniăn lĕm, châ tơƀrê tung mâu kơvâ kơmăi kơmok, pêi chiâk deăng, tê mơdró tung pơla tơdjuôm pá puât tung lâp plâi tơnêi.

Laga tiô tối hdrối tơdroăng ối pá puât hên, kal pơtối mơdât châ tơƀrê pơreăng; hbrâ ăm Hneăng hôp tơnêi têa 5, hbrâ pơxiâm po hneăng hôp dêi Kuô̆k hô̆i ƀă Chin phuh, SEA Games 31 ƀă hía hé. Xua mê Ngế pro xiâm hnê ngăn tơnêi têa pơkâ thế mâu kăn teăng mâ kheăn kơdeăn tơdroăng, veăng kum mâu hnoăng cheăng, troăng pêi châ tơƀrê.

A Sa Ly tơplôu ƀă tơbleăng