Tơbleăng a rôh hôp, pôa Phạm Minh Chính Ngế pro xiâm hnê ngăn tơnêi têa pơkâ thế mâu kăn tơkŭm tơpui ‘na tối Tơbleăng mơgêi hneăng pêi cheăng dêi Hô̆i đong Tơ’noăng khĕn kơdeăn Xiâm Tơnêi têa hơnăm 2024, tơleăng pêi tơdroăng kal tung hơnăm 2025; tơpui veăng hnê tối ‘na tơdroăng pâ thế pơxá inâi ‘’tơplâ khên tơnôu mâu lêng dêi kuăn pơlê”, inâi “Pêi cheăng kơhnâ khên tơnôu” ăm mâu khu pú hên, mâu ngế.

Tối ki hlo ai khât tung tơdroăng tơ’noăng, khĕn kơdeăn hơnăm 2024: Kal tối nhên mâu tơdroăng, hnoăng hiăng châ pêi pro, mâu tơdroăng ki u ối, ki pá. ‘Nâi nhên tơdroăng vâ pêi tung hơnăm 2025 ƀă pơkâ mâu tơdroăng cheăng pêi, troăng hơlâ kal tơmâng mơdêk ki tơƀrê ƀă ai pơxúa dêi tơdroăng tơ’noăng khĕn kơdeăn.

Malối Ngế pro xiâm hnê ngăn tơnêi têa pơkâ thế mâu kơ koan chêh hlá tơbeăng tơkŭm tơbleăng rơdêi tâ nếo, vâ tơdroăng mê mot tung tuăn kuăn pơlê. Tung hơnăm 2024, Kăn xiâm hnê ngăn tơnêi têa, Ngế pro xiâm hnê ngăn Chin phuh hiăng khĕn kơdeăn mơhá pri ăm vâ chê 95 rơpâu ngế ăm khu pú hên, mâu ngế ai hnoăng kơhnâ rơkê tung mâu tơdroăng mơhnhôk tơ’noăng, tung mơjiâng ƀă kring vế tơnêi têa.