Ngế pro xiâm hnê ngăn Chin phuh mơnhên Việt Nam đi đo nhuô̆m Mih cho khu tơrŭm kal khât tung pêi cheăng ton xŏn; mơnhên tơdroăng pơtâng hnê tối dêi pôa Tô Lâm, Kăn xiâm pơkuâ hnê ngăn Đảng ƀă khu râ kăn xiâm Việt Nam ki rơhêng vâ tối nhuô̆m ƀă pói vâ tơrŭm krá tơniăn ƀă pôa Donald Trump, Kăn xiâm pơkuâ kong têa Mih vâ mơdêk tơrŭm cheăng Khu tơrŭm cheăng ton xŏn.

Ngế pro xiâm hnê ngăn Chin phuh tối tơdêi kal pơtối djâ tơrŭm cheăng kâ – tê mơdró - mơ’no liăn cheăng cho tí ki eăng ƀă mơhnhôk dêi tơrŭm cheăng pơla péa pâ. Chin phuh Việt Nam đi đo tơmâng pro tơ’lêi hlâu ăm mâu tơdroăng pêi cheăng dêi khu tê mơdró, khu mơ’no liăn cheăng Mih a Việt Nam, mơnhên Việt Nam pói vâ mơjiâng tơrŭm cheăng kâ – tê mơdró – mơ’no liăn tơdâng tơ’mô, tơniăn, tơtro ƀă krá tơniăn ƀă Mih, xua pơxúa tơdjuôm dêi péa tơnêi têa.