A rôh tơdah, pôa Phạm Minh Chính, Ngế pro xiâm hnê ngăn Chin phuh mơnhên tối khât tơrŭm cheăng tơniăn lĕm pơla Việt Nam ƀă kong pơlê kân California tối tơdjuôm ƀă pơlê kong kân Oakland tối krê, malối cho ‘na cheăng kâ, tê mơdró ƀă tơrŭm kơno tuk têa kơxĭ; tối nhên kong pơlê kân California cho môi tung mâu pơlê kong kân ki kal xiâm dêi Việt Nam ƀă vâ chê 100 khu mơdró kâ dêi kong pơlê kân hiăng ‘no liăn cheăng a Việt Nam, khu mơdró kâ Việt Nam xuân hiăng ai lối 70 tơdroăng tơkêa ‘no liăn cheăng a California.

Pôa Phạm Minh Chính pơkâ thế ngế pơkuâ pơlê kong kân Oakland ƀă mâu kăn pơkuâ kong pơlê kân California pơtối tơmâng ngăn mơnhông tơrŭm cheăng ƀă Việt Nam, malối cho ‘na cheăng kâ, tê mơdró, ‘no liăn cheăng ƀă trâm mâ kuăn pơlê, cho hnoăng cheăng ki kông tơdjêp pơla Mih ƀă Việt Nam tối tơdjuôm xuân môi tiah pơla khu mơdró kâ péa tơnêi têa tối krê, veăng kum mơdêk ƀă ‘mâi mơnhông tâ nếo tơrŭm cheăng Việt Nam – Mih.